Qanday qilib 20 daqiqada kaloriyalarni parchalash mumkin?

Qanday qilib 20 daqiqada kaloriyalarni parchalash mumkin?

 

Biz jismoniy mashqlar tanamizdagi mushaklarni mustahkamlash va kuchimizni oshirishga yo‘naltirilgan, deb hisoblashga odatlanganmiz. Biroq organizmdagi yog‘larni tabiiy yo‘l bilan parchalash imkonini beruvchi ko‘plab foydali dasturlar mavjud. Don't panic nashrida shu mavzuda maqola taqdim etildi. 

Dasturlardan birini bajarish uchun  20 daqiqadan ortiq vaqt ketmaydi. U mashhur fitnes-murabbiy Adam Rozante tomonidan tuzib chiqilgan. U tanadagi kuch va epchillikni rivojlantiruvchi mashqlardan iborat. 

Bundan tashqari, u tuzgan dastur ortiqcha vazndan tezroq xalos bo‘lishga yordam beradi. Mashqlarni asta-sekinlik bilan ko‘paytirib boring. Ikki haftadan keyin taroziga chiqib, natijani ko‘rishingiz mumkin bo‘ladi. 

 

180 daraja

To‘g‘ri turib oling, oyoqlar yelka kengligida, qo‘llar bosh orqasida. Qo‘llarni tepaga ko‘tarib, 180 darajaga o‘girilib sakrang (suratga qarang). Mashqni takrorlash vaqtida boshlang‘ich holatingizga qaytishingiz kerak. 

 

«Alpinist qadamlari»

Yerdan tortilish mashqini bajarishga tayyorlanayotgandek holatga kirishing (suratga qarang). Kaftlaringiz va oyoq barmoqlaringizga tayaning. Tana holatini o‘zgartirmaslikka harakat qiling, tizzangizni buking va ko‘krak tomonga torting. Shu holatda ikki soniyacha turing va asl holatingizga qayting. Bu mashq yog‘larni yaxshi parchalaydi, qorin va yelka mushaklarini mustahkamlaydi.

 

Uzunlikka sakrash va yugurish

Polda xatlab sakraydigan bir nuqtani belgilab oling. Uning oldiga turing, oyoqlar yelkalar kengligida. Chuqur nafas olib, imkon qadar uzoqqa sakrang. Shundan so‘ng darhol o‘girilib, orqaga qayting. Sakrash va yugurishni ana shunday ketma-ketlikda bajarishda davom eting. Agar bu mashqni bajarishingiz uchun etarlicha kenglik bo‘lmasa, uzunlikka sakrash o‘rniga balandlikka (tepaga) sakrang va turgan joyingizda yuguring. 

 

O‘tirib turish va sakrash

Oyoqlarni yelka kengligida qo‘ying, ularni xuddi odatiy o‘tirib-turish mashqidagi kabi buking-da va tezda o‘ngga qarab sakrang. Sakrash vaqtida qo‘llaringiz tepaga qaragan bo‘lsin. Oyoqlaringizni erga to‘liq qo‘ymang, faqat barmoq sohasi tegib tursin va shu zahotiyoq chap tomonga sakrab, dastlabki holatingizga qayting. Ushbu mashqni ketma-ket takrorlang. 

 

Bir oyoqda sirpanish mashqi

Oyoqlarni birlashtiring, tovonlar bir-biriga tegib tursin. Muvozanatni saqlab turish uchun qo‘llaringizni belingizga qo‘ying. Bir oyoqni joyida ushlab turib, ikkinchisi bilan bir tomonga sirpanuvchi harakatni bajaring va shu alfozda o‘tiring. Bir soniya shunday holatni saqlab, dastlabki holatingizga qayting va keyingi safar takrorlaganingizda boshqa oyoq bilan sirpaning. 

 

O‘tirib turish va tortilish

Tizzalarni bukib, son sohasi polga parallel holatda bo‘lgunga qadar o‘tiring, orqaga sakrang, keyin qo‘llaringiz bilan polga tayaning-da oyoqlarni bir sakrab orqaga cho‘zing va yerdan tortilish mashqini bajaring (suratga qarang).  O‘tirish holatiga qaytish uchun oldinga qarab sakrang. Avvaliga qiyin tuyulishi mumkin, takroriy mashqlardan keyin esa uni osonlikcha bajaradigan bo‘lib ketasiz. 

 

Yuz metrga yuugur ish

So‘nggi mashqdan keyin darhol imkon qadar tezroq 100 metrlik  masofani yugurib o‘ting. Agar buning uchun imkon (joy) bo‘lmasa, bir joyda turib yugurish mashqini 15 soniya davomida bajaring. Shu bilan sizning 20 daqiqalik jismoniy mashqlaringiz o‘z nihoyasiga yetadi.

Manba: Xabardor.uz