“АЛ ва КҲК педагогларининг меҳнатига ҳақ тўлаш, тарификация ва назорат ишлари тартиби бўйича услубий кўрсатма” тасдиқланди

Ўзбекистон Республикаси Вазирлар Маҳкамасининг 2008 йил 1 августдаги “Ўрта махсус, касб-ҳунар таълими муассасалари ходимларини меҳнатига ҳақ тўлашнинг такомиллаштирилган тизимини тасдиқлаш тўғрисида”ги 165-сон қарори ижросини таъминлаш ҳамда мазкур соҳада ижро, назорат ва таҳлилни олиб бориш ишларига ягона ёндашувни шакллантириш мақсадида “Академик лицей ва касб-ҳунар коллежлари педагогларининг меҳнатига ҳақ тўлаш, тарификация ва назорат ишлари тартиби бўйича услубий қўрсатма” Ўрта махсус, касб-ҳунар таълими маркази томонидан ишлаб чиқилди.

Услубий кўрсатма 68 банддан иборат бўлиб, тизимда молиявий бошқарувни янада такомиллаштириш имконини яратади.

Ушбу Услубий кўрсатмада биринчи марта

1. Таълим муассасасининг йиллик иш режасига молиявий ҳужжат мақомида қараш йўлга қўйилмоқда;
2. Меҳнатга ҳақ тўлашда ишлатиладиган ҳужжатлар бирламчи ва иккиламчи тасдиқловчи ҳужжат сифатида таснифланди ва уларни шакллантириш кетма-кетлиги, муддатлари кўрсатиб берилди;
3. Таълим муассасанинг  бир йил давомида олиб бориладиган фаолияти учун тўланадиган молия маблағларини тасарруф этишда таълим муассасасининг баъзи фойдаланилмай келаётган ваколатларига аниқлик киритилди ва улардан фойдаланиш таълим мазмунини ошишига олиб келиши кўрсатилиб берилди;
4. Ижро назоратининг босқичлари, мазкур босқичларда амалга ошириладиган ишлар таркиби, уларни расмийлаштириш тартиби кўрсатилди;
5. Ўқитувчи томонидан ҳар ойда фақат бир варақ ҳисобот юритилиши белгиланди, бундан бошқа “қоғозбозлик”га олиб келадиган қоғоз талаб этилмаслиги қоидаси ўрнатилди;
6. Кафедранинг роли ва муҳимлик даражаси яққол таъкидланди;
7. Таълим муассасаси директорининг молиявий бошқарув буйруқлари мазмуни ва мақоми белгилаб берилди;
8. Молиявий бошқарув иштирокчиларининг вазифалари очиб берилди.

Услубий кўрсатма ўқитувчига ҳисобот топширувчи персонал сифатида қарамасдан, ўқувчига таълим-тарбия бериш фаолияти энг юқори мезон эканлигидан келиб чиқиб, таълим муассасаси раҳбарияти ўқитувчига унинг асосий фаолияти билан шуғилланиши учун барча шароитларни яратиб бериши, имкон қадар қоғозбозлик ва текширувларда ўқитувчининг иштирокини бартараф этиш зарурлиги ғояси илгари сурилди. Ўқитувчининг турли текширувларда иштирок этиши таълим муассасаси раҳбариятининг бирламчи ва иккиламчи асословчи ҳужжатларни шакллантира олмаганлиги боис юз беради. Агар молия текширувчиси учун мазкур ҳужжатлар тўлиқ шакллантирилса ўқитувчининг текширувларда иштироки учун ўрин қолмаслиги Услубий кўрсатмада белгиланган.

Услубий кўрсатмадан амалиётда фойдаланиш пайтида юзага келган саволлар ҳамда Услубий кўрсатмани янада такомиллаштириш бўйича таклиф ва мулоҳазалар билан бизнинг TAK.UZ сайтимизга мурожаат қилинг.

Услубий кўрсатмани юклаб олиш учун қуйидаги тугмани босинг.